Jump to content

uMkhosi kaNomkhubulwane

Kubuya ku Wikipedia

Umkhosi wenkosazane yezulu uNomkhubulwane ungumkhosi wesizwe samaZulu wenkosazane yemvula, indalo kanye nenzalo. Uthingo lwenkosazane, inkungu nemvula siyizembatho zenkazimulo yakhe. Kwakukholwa ukuthi inkosazane yezulu uNomkhubulwane yiyo elawula ukutshalwa nesivuno emasimini, iphinde ilawule ubuntombi ezintombini noma ebantwini besifazane. Kunenkolelo yokuthi le nkosazane iletha inhlanhla ebantwini besifazane okubalwa kona ukugana kanye nesipho sokuthola abantwana.

Lo mkhosi wawugujwa abantu bomdabu ngaphambi kokufika kwenkolo yamaKristu.[1] Lo mkhosi ungumkhuluko wesizwe lapho kucelwa khona imvula, inala, inzalo, nokuthula ezweni. ISilo saMabandla, uNgangezwelakhe wavuselela leli siko waqoka isizwe sakwaSokhulu ukuba yisona esisingatha lo msebenzi. Isigubhu seNkosazane silandwa khona endaweni yakwaSokhulu. Omunye umkhosi ohlobene nalona ubizwa umkhosi kaNomdede, nawo okungumkhosi wezolimo. Kulomkhosi kuya abantu besifazane bodwa ngenjongo yokuyothiyaza isivuno esihle. [2]

uMsukagama

[hlela | Hlela umthombo]
Igama elithi Nomkhubulwane libhalwe ngesibheqe sohlamvu nonobumba besilathini ngezansi

Incazelo evamile yegama elithi uNomkhubulwane ithi 'uyinkosazane ekwazi ukuguqula isimo sakhe kube esanoma yisiphi isilwane' noma 'uyinkosazane enomkhuba wobulwane'. [3] [4]

Ngokuphambene, incazelo ejulile yegama le nkosazane elithi uNomkhubulwane iveza ukuthi lo thixokazi unobuntu besifazane.[2] Isiqalo esithi 'No' simele unina walokho okukhulunywa ngakho, Isib. unomusa > unina womusa, bese isiqu esithi 'Khubula' siyisenzo esisho ukulima ngegeja nokutshala. Lisuka egameni elithi  ikhuba (ilikhuba) ngolimi lwanamuhla elisho igeja lomkhono noma igeja lokuhlakula ensimini noma esivandeni. Uma kujotshelelwa isinciphiso -ane, ahlangana athi No + khubula + -ane, bese lapho kungwaqaziswa, unkamisa "a" uguquka abe ngu "w" bese kuphinyiswa kuthi Nokhubulwane. Bese kuthi lapho kufakwa ungwaqa “m” uyisakhi esisemkhathini esakha imvumelwano egameni, kugcine sekuthiwa Nomkhubulwane. Le ncazelo iyamanisa inkosazane nesenzo sokulima nokuvuna, futhi Isichazamazwi sikaVilakazi noDoke naso sithi leli gama livela esenzweni esibizwa 'umkhubulo', 'inkubulo' noma 'ukukhubula' (second sowing, resowing, rereaping). [5]

Amasiko womkhosi

[hlela | Hlela umthombo]

Ukulinywa kwensimu yeNkosazane kwaSokhulu

[hlela | Hlela umthombo]

INkosi yakwaSokhulu yabe seyinikela ngensimu elinywa amakhosikazi esizwe njengensimu yeNkosazane uNomkhubulwane.  Le nsimu ilinywa amakhosikazi agcagcile athelwa ngenyongo hhayi intombi noma ingoduso. Nakuba izintombi zingavunyelwe ukuyolima kodwa kuneqhaza ezilibambayo kulo mkhosi.  Ngalolu suku izintombi nto ezingamatshitshi zisuke zibuthene nazo lapho kuzophumela khona amakhosikazi.

Lokhu kuwuphawu lokuhlalisa iNkosazane. Izintombi ngalolu suku zibhica kuhle kwabafana.  Zibhinca amabheshu futhi zikhiphe izinkomo zizikhaphele edlelweni.   Ukukhaphela izinkomo edlelweni kuwuphawu lokuthi bathwele kanzima, isimo sibi ngakho-ke bacela izibusizo kuNkosazane yezulu.

Amakhosikazi wona afike ahlwanyele imbewu enhlobonhlobo kule nsimu.  Le nsimu ilinywa kuphela, ayihlakulwa futhi kayivunwa futhi.  Ukudla kwakhona kudliwa izinyoni zezulu nezilwane zasendle.   Umuntu oyisihambi kuphela okunguyena oke adlule andle ngenxa yephanga lohambo ulude.

Amakhosikazi athi angaqeda ukulima bese ehabula nasemashungwini, bachwaye futhi basine ingoma (ukuphuza amahewu abafike nawo).  Kuthi lapho sebezanelisile ngokuphuza, bese okusele bakuthela phansi.  Ukuthela phansi lokhu kuwuphawu lokupha nokunikela eNkosazaneni uNomkhubulwane. Konke kusala ensimini. Akuvumekile uphume nokuthile okusele. Kuthiwa uma uphuma ensimini nokuthile uzilethela umkhuhlane nenhlupheko.

Usuku olwandulela umkhuleko

[hlela | Hlela umthombo]

Ngosuku olwandulela umkhuleko, isizwe siyazila futhi sizithibe.  Akukho namunye ovumekile ukuba eqe iziko noma ukuvakashela elawini. Abasimame abasemfuleni yabo akuvumekile ukuba bayongena ensimini yeNkosazane kodwa baba ingxenye yombungazo ekhaya.

Ngokujwayekile ngosuku olwandulela umkhuleko, amakhosikazi abuthana emzini weNkosi uMthiyane kwaSokhulu.  Kungaleso sikhathi lapho bexoxa ngezinto eziphathelene nokuphathwa kwemizi.  UNgangezwelakhe, njengoNomthebe nomvikeli wamasiko uyaye aqoke omunye woNdlunkulu bakhe ukuba asingathe lo mkhuleko.

Lo mkhuleko ulungiselelwa ngenyanga kaNhlangulana (uJuni). Ubukhosi bakwaSokhulu noMnyango Wezobuciko Namasiko baya kokhuleka eNdlunkulu kaZulu ngaphambi kokuba kuqale lo mkhuleko/ umkhosi.

Usuku lomkhuleko/ lomkhosi

[hlela | Hlela umthombo]

Ngosuku lomkhuleko kusempondozankomo (ekuseni kakhulu), amakhosikazi avuka ahlembe. Athi angaqeda bese abuthana egcekeni. INyosi ibe seyiyamemeza ibikela abaphansi namakhosi asalala ibacelela indlela enhle ebheke ensimini.  Amakhosikazi azoqala ihubo eyophuma ngesango etshethe amakhuba nembewu. Emva kokuphothulwa kokulinywa kwensimu. Amakhosikazi abuyela ekhaya leNkosi.  INyosi yeNkosi yakwaSokhulu izobe isibikela iNkosi. INkosi ibe isimukela Ndlunkulu namakhosikazi abuya ensimini. UNdlunkula uba nezwi namakhosikazi, awavuselele ngokuphathwa kwemizi, indlela yokuziphatha yomuntu wesifazane, nokubamba iqhaza ekuthuthukiseni isizwe. Uma sekubuya ensimini. UNdlunkulu uba nezwi namakhosikazi awagqugquzela ukuba asukume azithathe, akhuthale ekulimeni nasekuletheli ukuthula emakhaya. Emva kwalokho kube sekunandiswa ngobuciko obunhlobonhlobo okubalwa kubo, ukugida, ukuhaya (izinkondlo zomdabu, imilolozelo) nokunye kokunandisa. [6]

Amaphatho

[hlela | Hlela umthombo]
  1. ↑ "Archive copy". Archived from the original on 2026-01-25. Kulandwe ngomhlaka 2026-03-27.CS1 maint: Archived copy as title (link)
  2. 1 2 Thorpe, Shirley A. African Traditional Religions: An Introduction. Pretoria: University of South Africa, 1991
  3. ↑ https://www.andriesbotha.net/artwork/2006-2010/nomkhubulwane/
  4. ↑ "Archive copy". Archived from the original on 2025-11-09. Kulandwe ngomhlaka 2026-03-27.CS1 maint: Archived copy as title (link)
  5. ↑ Doke, Vilakazi (1972). Zulu-English Dictionary. Witwatersrand University Press. p. 408.
  6. ↑ https://ubuntombi.co.za/?p=498